Du har en nettleser som vi ikke støtter. Les om godkjente OS/nettleserversjoner

Hopp til hovedmeny Hopp til innholdet

Riekti lohkat iežat pasieantajournála

Dus lea riekti oaidnit mii čuožžu du pasieantajournálas, ja dan sáhtát lohkat dál digitálalaččat maiddái.

Mann som ser i journalen sin
Foto: Johnér Bildbyrå AB

​Du pasieantajournála lea čoakkáldat dieđuin dearvvašvuođaveahki birra maid leat ožžon. Juohke dikšunbáikkis gos leat ožžon dearvvašvuođaveahki, nugo buohcciviesus dahje fástadoavtterkantuvrras, galget ráhkadit pasieantajournála.

Dus lea riekti lohkat iežat journála, ja jus háliidat, de sáhttet dutnje maiddái čilget sániid ja dajahusaid maid lea váttis áddet. Dus lea maiddái riekti oažžut diehtit geat besset oaidnit du journála, ja geaidda leat addon dieđut das.

Loga eanet mo dieđut du pasieantajournálas meannuduvvojit.

Pasieantajournála digitála lohkan

​Davvi Dearvvašvuođa ja Oarji Dearvvašvuođa buohcciviesut fállet dál pasieantajournála digitála lohkama pasieanttaide boarrásat go 16 jagi ja sidjiide geain lea váhnenovddasvástádus vuollil 12-jahkásaš mánáide. Gaskal 12- ja 16-jahkásaš mánáid várás ferte ain čoavdit moadde teknihkalaš hástalusa.

Buot dokumeanttaid ii sáhte čájehit digitálalaččat.

Ná bivddát lohkama bábir- dahje CD-hámis

Váldde oktavuođa iežat dikšunbáikkiin jus háliidat lohkat iežat pasieantajournála. Sáhtát maiddái bivdit kopiija journálas. Dáiddát fertet máksit bálvalanmávssu.

Dus lea pasieantajournála buot báikkiin gos leat ožžon divššu: Fástadoaktára luhtte, buohcciviesus, bátnedoaktára luhtte ja eará dikšuid luhtte.

Lohkama biehttaleapmi

Erenoamáš oktavuođain sáhttet dearvvašvuođabargit biehttalit du lohkamis olles dahje oasi journálas.

Loga eanet pasieanta- ja geavaheaddjivuoigatvuođalágas § 5-1 (lovdata.no)

Jus it beasa lohkat journála, de sáhtát váidit ášši Fylkkamánnái. Oza iežat fylkkamánni (fylkesmannen.no).

Du pasieantajournála earáid lohkan

​Journála dieđuide guoská jávohisvuođageasku, ja dábálaččat dušše sii geat dárbbašit dieđuid journálas relevánta dearvvašvuođaveahki olis, galget beassat oaidnit journála.

Dearvvašvuođabargit, geat fertejit oaidnit pasieantajournála addin dihtii dutnje dorvvolaš divššu, ovdamearkka dihtii boahtte háve go čálihuvvot buohccivissui, besset maiddái oaidnit journála jus don it vuosttal. Jus vuosttaldat oaidnima, de ferte árvvoštallat lea go dorvvolaš addit dutnje dearvvašvuođaveahki vaikko eai oainne dieđuid.

Du lagamus oapmahaččat galget beassat oaidnit du pasieantajournála jus mieđat dasa dahje dilálašvuohta gáibida dan, ovdamearkka dihtii jus leat dieđuheapme. Vuollil 16-jahkásaš mánáid váhnemiin lea dábálaččat riekti oaidnit máná journála, muhto dása leat spiehkastagat.

Sáhtát maiddái addit earáide fápmudusa beassat oaidnit du pasieantajournála, dahje don sáhtát beassat oaidnit sin pasieantajournála fápmudusain.

Geahča dieđuid pasieanta- ja geavaheaddjivuoigatvuođalágas § 5-1 oapmahaččaid lohkanrievtti birra ja go pasieanta lea mánná (lovdata.no).

Lagamus oapmahaččas lea riekti lohkat jápmán pasieantta journála, nu guhká go dasa eai leat erenoamáš vuosteákkat.

Pasieantajournála sisdoallu

​Journálas leat earret eará dieđut diagnosas, buohcuvuođajođus, divššus, iskkusvástádusain, dieđuin mat leat addon, ja eará beliin main sáhttá leat mearkkašupmi dikšui dahje vejolaš maŋitáigge divššuide.

Pasieantajournála dieđuid divvun ja sihkkun

​Jus oaivvildat ahte journálas leat boasttudieđut dahje váilevaš dieđut, de sáhtát bivdit dikšunbáikki divvut dahje sihkkut dieđuid.

Sáhtát váidit ášši Fylkkamánnái jus du sávaldat ii doahttaluvvo. Oza iežat fylkkamánni (fylkesmannen.no).

Geahča eanet dieđuid pasieanta- ja geavaheaddjivuoigatvuođalágas § 5-2 pasieantajournála dieđuid divvuma ja sihkkuma eavttuid birra (lovdata.no).