Du har en nettleser som vi ikke støtter. Les om godkjente OS/nettleserversjoner

Hopp til hovedmeny Hopp til innholdet

Kvalitehtaindikáhtoriid geavaheapmi go vállje dikšunbáikki

Olu pasieanttat háliidit diehtit gos “leat čeahpimusat” go áigot válljet dikšunbáikki. Nationála kvalitehtaindikáhtorat sáhttet muitalit juoidá dearvvašvuođabálvalusaid kvalitehtas, muhto kvalitehtaindikáhtoriid dulkon sáhttá leat mohkkái.

​Kvalitehtaindikáhtor lea eahpenjuolga mihttár, geažideapmi, mii muitala juoidá kvalitehta birra aiddo dan suorggis mii mihtiduvvo.

Nationála kvalitehtaindikáhtorat leat meroštallojuvvon dálá statistihkaid ja nationála registariid vehkiin ja mihtidit dearvvašvuođabálvalusa kvalitehta iešguđet beliid.

Pasieantan lea dus riekti válljet dikšunbáikki. Siiddus helsenorge.no/velg-behandlingssted sáhtát oaidnit mat dikšunbáikkit fállet divššu maid don dárbbašat.

Kvalitehtaindikáhtoriid dulkon

Berret dulkot nationála kvalitehtaindikáhtoriid várrogasvuođain go áiggut válljet dikšunbáikki. Muhtun indikáhtoriid bohtosiid erohusat sáhttet leat eará áššiid geažil go kvalitehta erohus. Ovdamearkka dihtii sáhttá leat nu, ahte olusat dain heajumus ja kompleaksamus pasieanttain sáddejuvvojit dan dikšunbáikái mas lea eanemus gelbbolašvuohta ja hárjáneapmi dihto suorggis. Dát mearkkaša ahte dán dikšunbáikkis sáhttá leat pasieantajoavku mii lea heajut buohccit, ja danne orrot dikšunbáikkis heajut bohtosat dihto nationála kvalitehtaindikáhtoriin, muhto dat ii mearkkaš ahte dearvvašvuođabálvalusaid kvalitehta lea heajut.

Dál eai leat vuos ráhkaduvvon nu olu kvalitehtaindikáhtorat mat gustojit dihto dávddaide ja diagnosaide. Vaikko dikšunbáikkis leat heajut bohtosat muhtun kvalitehtaindikáhtoriin, de sáhttá dikšunbáiki dattetge hálddašit dan divššu maid don dárbbašat.

Kvalitehtaindikáhtorat meroštallojit dieđuid vuođul mat leat rapporterejuvvon iešguđet registariidda. Jus rapporterejuvvon dieđut leat boastut dahje váilevaččat, de mielddisbuktá dan ahte nationála kvalitehtaindikáhtoriid bohtosat leat eahpesihkkareabbo.

Dávjá go geahččá mo bohtosat ovdánit áiggi mielde, de sáhttet dat addit eanet dieđuid. Dáidet leat čielga sesoŋŋavariašuvnnat dahje dáiddát oaidnit čielga tendeanssaid dasa ahte dikšunbáiki áiggi badjel lea olahan buoret bohtosiid muhtun kvalitehtaindikáhtoriin.

Jus unnán pasieanttat leat mielde dikšunbáikki kvalitehtaindikáhtora meroštallamis, de bohtosat dávjá rievddadit eanet áiggi badjel. Sivvan dasa lea go bohtosiidda álkit váikkuhit soaittáhatdáhpáhusat, maid ovttaskas dikšunbáiki ii sáhte stivret.

Vaikko ovttaskasbohtosiid ja ovttaskasindikáhtoriid berre dulkot várrogasvuođain, de almmatge sáhttet buot nationála kvalitehtaindikáhtorat ovttas addit gova dikšunbáikki kvalitehtas. Dat addet ovdamearkka dihtii dieđuid man muddui dikšunbáiki čuovvu dikšunnjuolggadusaid, devdet go pasieantavuoigatvuođaid ja leat go geavaheaddjit duđavaččat.

Nationála kvalitehtaindikáhtoriid bajilgovva

Juohke dikšunbáikái leat mii čohkken olámuttu kvalitehtaindikáhtoriid sierra bajilgovvan. Dás sáhtát oaidnit bohtosiid ovdáneami áiggi badjel ja buohtastahttit riikka gaskameriin.

Sáhtát maiddái válljet buohtastahttit eará válljen láhkai dikšunbáikki, dahje válljet mannat viidáseappot juohke kvalitehtaindikáhtorii dárkilabbot geahččat bohtosiid.

Dikšunbáikkit main váilot kvalitehtaindikáhtorat

Buot dikšunbáikkit, mat leat oassin spesialistadearvvašvuođabálvalusas, galget rapporteret nationála registariidda ja galget leat mielde kvalitehtaindikáhtoriid meroštallamis. Dát guoská almmolaš dikšunbáikkiide, priváhta dikšunbáikkiide main leat šiehtadusat, ja priváhta dikšunbáikkiide maid HELFO lea dohkkehan.

Sáhttet leat iešguđet sivat dasa go dikšunbáikái ii leat almmuhuvvon kvalitehtaindikáhtor. Priváhta dikšunbáikkis ferte leat gustovaš šiehtadus dahje dohkkeheapmi dan áigodagas goas indikáhtoriid meroštallet. Dikšunbáikkit mat gieskat leat dahkan šiehtadusa dahje dohkkeheami, eai nappo oidno ovdal muhtun áiggi geahčen.

Muhtun dikšunbáikkiin eat nagot earuhit mii leat dahkkon juohke dikšunbáikkis mii lea seamma fitnodagas dahje organisašuvnnas. Sivvan dása lea earret eará mo logut leat rapporterejuvvon iešguđet registariidda. Diein oktavuođain eai gávdno sierra kvalitehtaindikáhtorat dikšunbáikái, muhto gávdnojit indikáhtorat alit dássái organisašuvnnas masa áigeguovdilis dikšunbáiki gullá. Ovdamearkka dihtii sáhtát oaidnit olles dearvvašvuođafitnodaga loguid dan sadjái go ovttaskas dikšunbáikki loguid.