Du har en nettleser som vi ikke støtter. Les om godkjente OS/nettleserversjoner

Hopp til hovedmeny Hopp til innholdet

Guorahallama ja divššu vuordináiggit

Vuordináigi lea áigi mii gollá das rájes go dikšunbáiki oažžu du sáddejumi dassái go sáhtát boahtit guorahallamii dahje dikšui.

Siiddus helsenorge.no/velg-behandlingssted leat vurdojuvvon vuordináiggit birrasii 200 guorahallama ja divššu fysalaš dearvvašvuođas, psyhkalaš dearvvašvuođas, gárrenmirkkos ja darváneapmi.

Vurdojuvvon vuordináigi lea dat eanemus vahkkolohku maid dikšunbáiki atná ahte don pasieantan fertet vuordit ovdalgo sáhtát álggahit guorahallama dahje divššu.

Vuordináigi lea individuála

Buot sáddejumit dikšunbáikái árvvoštallojit individuála.

Go sáddejupmi lea sáddejuvvon buohccivissui dahje dikšunásahussii, de galgá dikšunbáiki vástidit dutnje 10 bargobeaivvi siste. Vástádusreivves čuožžu lea go dus riekti dearvvašvuođaveahkkái dahje ii. Jus dus lea riekti dearvvašvuođaveahkkái, de čuožžu goas ja gosa leat ožžon tiimma.

Pasieanttat, geain lea seamma diagnosa, sáhttet oažžut iešguđet vuordináiggiid. Man guhká don fertet vuordit, lea earret eará sorjavaš dávdda duođalašvuođas, du dearvvašvuođadilis ja dálkkasgeavaheamis, ja fertejit go dus dikšut máŋga diagnosa oktanaga.

Vuordinlisttut ođasmahttojit mánnosaččat

Juohke dikšunbáikkis lea ovddasvástádus dasa ahte vuordináiggit mat almmuhuvvojit diehtojuohkinbálvalussii, álo leat ođasmahtton, relevánta ja riekta. Vuordináiggit ođasmahttojit juohke 4. vahku dahje dávjjit.

Jus háliidat diehtit leat go vuordináiggit neahttasiiddus ođasmahttojuvvon juohke mánu maŋimuš áiggi, de sáhtát geahččat dan nationála kvalitehtaindikáhtoriin.

Fysalaš dearvvašvuođa vuordináiggiid čilgehus

​Jus dárbbašat guorahallama dahje divššu fysalaš dávdda geažil, de sáhttá leat dárbu geahčadit golmmalágan vuordináiggi. Jus vuos galggat guorahallamii ja dasto beaivedikšui dahje sisačálihuvvot, de ferte vuordináiggiid bidjat oktii gávdnat oppalaš vuordináiggi dikšunbáikkis.

1. Guorahallan lea vuordináigi das rájes go dikšunbáiki oažžut sáddejumi dassái go pasieanta boahtá guorahallamii. Dása gullá maiddái iskkadeapmi.

2. Beaivedikšu lea vuordináigi das rájes go guorahallan nohká dassái go pasieanta oažžu divššu. Dása gullá buot mii ii leat sisačáliheapmi, maiddái poliklinihkalaš dikšu.

3. Sisačáliheapmi lea vuordináigi das rájes guorahallan nohká dassái go pasieanta oažžu divššu.

Jus sisačáliheami vuordináigi ii leat almmuhuvvon, de sáhttá medisiinnalaš sivaid geažil almmatge sisačáliheapmi leat áigeguovdil.

Psyhkalaš dearvvašvuođa vuordináiggiid čilgehus

Jus dárbbašat psyhkalaš dearvvašvuođa guorahallama dahje divššu, mii lea sorjavaš man dikšošlája don vuorddát, de sáhttet leat golmmalágan vuordináiggi.

1. Poliklinihkalaš guorahallan/dikšu lea vuordináigi das rájes go dikšunbáiki oažžu sáddejumi dassái go pasieanta boahtá guorahallamii dahje dikšui.

2. Poliklinihkalaš joavkodikšu lea vuordináigi das rájes go dikšunbáiki oažžu sáddejumi dassái go pasieanta sáhttá álgit jovkui.

3. Sisačáliheapmi lea vuordináigi das rájes go sisačáliheapmi čielgá dassái go pasieanta oažžu jándorsaji.

Gárrenmirkko ja darváneami vuordináiggiid čilgehus

​Jus dárbbašat gárrenmirkkoboasttugeavaheami ja avhengigheta guorahallama dahje divššu, de sáhttet leat njealjelágan vuordináiggi.

1. Poliklinihkalaš guorahallan/dikšu lea vuordináigi das rájes go dikšunbáiki oažžu sáddejumi dassái go pasieanta boahtá guorahallamii dahje dikšui.

2. Čielgan lea vuordináigi das rájes go dikšunbáiki oažžu sáddejumi dassái go pasieanta boahtá čielgamii.

3. Sisačáliheapmi – oanehisáigge (gitta 6 mánu) lea vuordináigái das rájes go sáddejumi ožžo dassái go pasieanta sisačálihuvvo.

4. Sisačáliheapmi – guhkesáigge (eanet go 6 mánu) lea vuordináigái das rájes go sáddejumi ožžo dassái go pasieanta sisačálihuvvo.

Jus dus ležžet gažaldagat vuordináiggiid hárrái, de sáhtát riŋget 800 HELSE (800 43 573) dahje sáddet e-poastta. Sáhtát maiddái váldit oktavuođa iežat fástadoaktáriin dahje dikšunbáikkiin.