Du har en nettleser som vi ikke støtter. Les om godkjente OS/nettleserversjoner

Hopp til hovedmeny Hopp til innholdet

Dárkkistankommišuvdna

Dárkkistankommišuvnnaid váldobargu lea sihkkarastit ovttaskaspasieantta riektesihkkarvuođa psyhkalaš dearvvašvuođasuodjalusain deaivvademiin. Kommišuvnnat galget danne dárkkistit buot bággomearrádusaid.

Dárkkistankommišuvdna galgá iešoaivves dárkkistit ahte buot bággosisačálihemiid formálalaš gáibádusat lea devdon psyhkalaš dearvvašvuođasuodjaluslága vuođul. Dat mearkkaša ahte sisačáliheapmi lea dáhpáhuvvan riekta.

Ásahus mii bággosisačáliha pasieantta, galgá danne sáddet kommišuvdnii kopiija mearrádusas viidáseappot iskkadeami dahje bákkolaš psyhkalaš dearvvašvuođasuodjalusa birra ja dokumeanttaid maid vuođul lea dahkan mearrádusa.

Dárkkistankommišuvnna jođiheaddji sáhttá ásahusa jearaldaga vuođul guhkidit dan nu gohčoduvvon bákkolaš dárkuma gitta 10 beivviin.

Váidagiid meannudeapmi

Dárkkistankommišuvdna meannuda váidagiid ásaheami, bákkolaš psyhkalaš dearvvašvuođasuodjalusa bisuheami dahje heaittiheami mearrádusa birra. Kommišuvdna galgá iskat leat go bákkolaš suodjalusa eavttut devdon. Jus kommišuvdna ii oainne daid devdon, de ferte pasieantta olggosčálihit.

Jus leat váidán mearrádusa heaittihit bákkolaš dárkuma dahje bákkolaš psyhkalaš dearvvašvuođasuodjalusa, de sáhttá dárkkistankommišuvnna jođiheaddji mearridit ahte heaittihanmearrádusa galgá maŋidit dassái váiddaášši lea meannuduvvon.

Bákkolaš suodjalusa dárbbu dárkkisteapmi

Jus pasieanta ii váidde bákkolaš psyhkalaš dearvvašvuođasuodjalusa ásaheami, de galgá dárkkistankommišuvdna dattetge árvvoštallat lea go dárbu psyhkalaš suodjalussii go leat gollan golbma mánu sisačáliheamis. Kommišuvdna galgá maiddái dalle dárkkistit ahte pasieanttas lea individuála plána.

Go lea gollan jahki das rájes go bákkolaš suodjalus ásahuvvui, de lea viidáseappot suodjalusa eaktun ahte dárkkistankommišuvdna miehtá suodjalusa guhkideapmái.

Dárkkistit mearrádusa bákkolaš suodjalusa čađaheami áigge

Jus pasieanta váidá, de galgá dárkkistankommišuvdna maiddái iskat mearrádusa mii dahkko bákkolaš suodjalusa čađaheami áigge.

Dát gusto dáidda mearrádusaide:

  • suddjen
  • gáržžideamit rievttis gulahallat olgomáilmmiin
  • iskat lanja ja dávviriid, ja rumašiskan
  • duogušteapmi
  • gužžaiskkus
  • bággoreaidduid geavaheapmi
  • sirdimat

Dárkkistankommišuvnna mearrádusaid sáhttá dušše duopmostuollu dárkkistit.

Dárkkistankommišuvdnii lea maiddái addon ovddasvástádus sihkkarastit pasieantta buresbirgejumi eanet oppalaš dásis. Kommišuvdna galgá danne maiddái váldit ovdan áššiid go oapmahaččat ja bargit jerret.

Regionála sihkkarvuođaossodagaid mearrádusaid dárkkisteapmi

Dasa lassin meannuda dárkkistankommišuvdna váidagiid mearrádusaid birra mat gusket pasieanttaide regionála sihkkarvuođaossodagain. Dát guoská dáidda mearrádusaide:

  • olbmo, lanja ja dávviriid iskan
  • gáržžideamit rievttis gulahallat olgomáilmmiin

Seammá gusto váidagiidda pasieanttain, geat leat ovttadagain gos lea erenoamáš alla sihkkarvuođadássi, dáid mearrádusaid ektui:

  • sirdin
  • gáržžideamit rievttis gulahallat olgomáilmmiin

Mánáid psyhkalaš dearvvašvuođasuodjalusa dárkkisteapmi

​Psyhkalaš dearvvašvuođasuodjalusa ásaheami vuollil 12-jahkásaš mánáide váhnenmiehtama vuođul galgá maiddái lágidit kommišuvdnii dalle go mánná ieš vuosttalda sisačáliheami.

Dieđiheapmi Fylkkamánnái

​Dárkkistankommišuvdna galgá dieđihit Fylkkamánnái áššiin goas atná mearrádusa dahje ášši moaittehahttin. Ášši sáhttá maiddái váldit ovdan vásttolaš doaktáriin dahje ásahusa jođihangottiin. Seammá gusto áššiide mat gusket fállon bálvalusa kvalitehtii.

Áigeguovdilis liŋkkat