اگر آپ کو خطرناک مادّوں سے واسطہ پڑے تو آپ کو کیا کرنا چاہیے؟
بڑے حادثات، دہشت گردی یا جنگ کی صورت میں آپ کو خطرناک مادّوں سے واسطہ پڑ سکتا ہے۔ یہ کیمیائی، چھوتی، ریڈیوایکٹیو (تابکار) یا دھماکہ خیز مادّے ہو سکتے ہیں۔ یہاں یہ قومی ہدایات دی جا رہی ہیں کہ ایسے خطرناک حالات میں آپ کو کیا کرنا چاہیے۔
خطرناک حالات میں یہ جاننا اہم ہے کہ آپ کیا کریں گے۔ آپ یہاں دی جانے والی ہدایات پر عمل کر کے خود کو اور اپنے پیاروں کو محفوظ رکھ سکتے ہیں۔
110، 112 اور 113 پر کال کر کے ایمرجنسی اداروں کو آگاہ کرنا اور موقع پر ان کی ہدایات پر عمل کرنا یاد رکھیں۔
خطرناک مادّوں سے واسطے کے متعلق تین اہم ہدایات
کیا ایمرجنسی ادارے موجود ہیں؟ عملۂ صحت (113)، پولیس (112)، فائر (110)، سرکاری حکّام اور معتبر ذرائع کی دی ہوئی ہدایات پر عمل کریں۔
اگر آپ کسی خطرناک مادّے کے قریب ہیں تو ایمرجنسی ادارے آپ کو ہدایات دیں گے کہ آپ کو کیا کرنا چاہیے۔ ہو سکتا ہے آپ سے کہا جائے کہ:
عمارت سے نکل جائیں یا خطرے سے دور ہو جائیں (اگر خطرناک مادّہ کسی عمارت وغیرہ کے اندر یا ایک مخصوص علاقے میں ہو)۔
عمارت کے اندر ہی رہیں، کھڑکیاں اور دروازے بند کر لیں (اگر خطرناک مادّہ باہر کی ہوا میں ہو)۔
چاہے آپ خطرناک مادّے سے زیادہ سے زیادہ فاصلہ رکھ رہے ہوں، یہ اہم ہے کہ آپ گھر جانے سے پہلے ایمرجنسی اداروں کو اطلاع دیں۔ اگر آپ علاقے سے نکل جائیں تو ممکن ہے آپ اہم معلومات اور علاج سے محروم رہ جائیں اور آپ کے ساتھ خطرناک مادّہ دوسری جگہوں پر پھیل جائے۔
اپنے کپڑے یا جوتے اتاریں۔ ممکن ہو تو دستانے استعمال کریں۔
اگر کپڑے آپ کی جلد سے چپکے ہوئے ہوں تو کپڑے نہ اتاریں۔
کپڑوں کو سر سے اوپر کرتے ہوئے نہ اتاریں۔ ممکن ہو تو قینچی سے کاٹیں یا پھاڑ دیں۔
تمام لباس، جوتے اور دستانے ایک پلاسٹک بیگ میں ڈال کر بیگ کا منہ باندھ دیں۔
دوسروں کی مدد کرنے سے پہلے خود اپنی مدد کریں۔
ممکن ہو تو آس پاس دوسرے کسی شخص کی مدد کرنے سے پہلے ہاتھ دھوئیں۔
کیا مادّہ آپ کی ِجلد کو لگ گيا ہے؟
اپنے چہرے کو نہ چھوئیں۔
ِلد کو پانی سے دھوئیں۔ ممکن ہو تو 5 منٹ تک نیم گرم پانی کا شاور لیں۔ آپ عام صابن اور شیمپو استعمال کر سکتے ہیں لیکن بام (balsam) نہ استعمال کریں۔
اگر پانی مہیا نہ ہو تو نمی والے ٹشوز یا پیپر ٹاول استعمال کریں۔
پہلے چہرہ صاف کریں۔
جسم کے ہر حصے کے لیے نیا ٹشو پیپر لیں۔
کیا مادّہ آپ کی آنکھوں میں پڑ گیا ہے؟
عام نل کے پانی سے 5 سے 15 منٹ تک آنکھیں دھوئیں (صابن نہ استعمال کریں)۔
آنکھیں دھوتے ہوئے کانٹیکٹ لینز اتار لیں۔
عینک کو صابن اور پانی سے دھوئیں۔ آپ عینک کو دھو کر پھر پہن سکتے ہیں۔
کیا مادّہ آپ کے منہ میں چلا گیا ہے؟
کلّیاں کریں۔
زور لگا کر الٹی نہ کریں نہ ہی کسی اور کو الٹی لانے کے لیے کہیں، سوائے اس کے کہ آپ کو اس کی ہدایت کی جائے۔
جب تک آپ کو ہدایت نہ ملے، کچھ نہ پیئیں۔
کچھ نہ کھائیں، سگرٹ نہ پیئیں اور سنوس کا استعمال نہ کریں۔
یہ عمومی ہدایات ہیں اور ایسے تمام بڑے حادثات یا خطرناک واقعات کے لیے ہیں جن میں لوگوں کو خطرناک مادّوں سے واسطہ پڑتا ہے۔ یعنی آپ کے تحفظ کے لیے ابتدائی اقدامات وہی رہتے ہیں، چاہے آپ کو کسی بھی قسم کے مادّے سے واسطہ پڑا ہو۔
جب کوئی واقعہ ہو جائے تو واقعے کی مناسبت سے مخصوص ہدایات دی جا سکتی ہیں۔
یاد رکھیں کہ خوف کی وجہ سے بھی آپ کی طبیعت خراب ہو سکتی ہے۔ طبیعت خراب ہونے کا مطلب لازماً یہی نہیں ہے کہ آپ کو خطرناک مادّوں سے واسطہ پڑا ہے۔
خطرناک مادّوں سے کیا مراد ہے؟
بعض مادّوں سے واسطہ خطرناک ہوتا ہے۔ یہ کیمیائی، چھوتی، ریڈیوایکٹیو (تابکار) یا دھماکہ خیز مادّے ہو سکتے ہیں۔ ایسے خطرناک مادوّں کے ساتھ ہونے والے غیر معمولی واقعات کو اکثر CBRNE واقعات کہا جاتا ہے۔
ایسے خطرناک واقعات مندرجہ ذیل اسباب سے ہو سکتے ہیں
بڑے حادثات
دہشت گردی
جنگ
مندرجہ ذیل علامات کی صورت میں ڈاکٹر سے رجوع کریں۔
CBRNE کا کیا مطلب ہے اور ان کی علامات کیا ہو سکتی ہیں؟
کیمیکلز یعنی کیمیائی مادّوں سے واسطہ پڑنے کے بعد اکثر جلد ہی تکلیف شروع ہو جاتی ہے لیکن ہمیشہ ایسا نہیں ہوتا۔ غیر معمولی بو یا دھواں دکھائی دینا کیمیکلز کی دوسری نشانیاں ہو سکتی ہیں۔
تیزابی مادّوں سے واسطہ پڑنے پر آپ کو جسم کے ان حصوں میں علامات پیش آ سکتی ہیں:
آنکھیں
ناک
گلا
ِجلد
بعض دوسرے کیمیائی مادّوں سے واسطہ پڑنے پر ایسی علامات ظاہر ہو سکتی ہیں:
تھکن
سانس لینے میں تکلیف
بل پڑنے کے ساتھ درد
بیہوش ہو جانا
اکثر کیمیائی مادّوں کی جتنی زیادہ مقدار آپ کے جسم میں پہنچے یا جسم سے چھوئے، یہ آپ کے لیے اتنے ہی زیادہ خطرناک ہوتے ہیں۔
بائیولوجیکل مادّوں سے مراد بیکٹیریا، وائرس اور ٹوکسنز (بائیولوجیکل مواد میں موجود زہریلے مادّے) ہیں جو چھوتی ہو سکتے ہیں اور انسانوں کو بیمار کر سکتے ہیں۔
بائیولوجیکل مادّوں سے واسطہ پڑنے کی عام علامات یہ ہو سکتی ہیں:
بخار
بیماری کا احساس
ممکن ہے کہ علامات ان مادّوں سے واسطہ پڑنے کے بعد کچھ وقت ٹھہر کر ظاہر ہوں - یہ وقت کچھ گھنٹے، کچھ دن یا کچھ ہفتے بھی ہو سکتا ہے۔ آپ کو بیماری کا احساس ہونے میں کتنا وقت لگتا ہے، یہ اس پر منحصر ہے کہ آپ کو کس قسم کی چھوت سے واسطہ پڑا ہے۔
ریڈیوایکٹیویٹی کی وجہ سے آپ اس صورت میں بیمار ہو سکتے ہیں کہ آپ ریڈیوایکٹیو ذرّات والی ہوا میں سانس لیتے رہے ہوں۔ مثال کے طور پر ریڈیوایکٹیو مادّے رکھنے والی عمارت یا گاڑی میں آگ لگنے کے بعد یہ ذرّات انسانوں تک پہنچ سکتے ہیں۔
اگر کسی ریڈیوایکٹیو مادّے کی شعاعیں بڑی مقدار میں آپ کے جسم میں پہنچیں تو بھی آپ بیمار ہو سکتے ہیں۔ عام طور پر ریڈیوایکٹیو شعاعوں کی علامات جلد ظاہر نہیں ہوتیں۔
انسانی جسم میں زیادہ بڑی مقدار میں شعاعیں پہنچنے سے ایسی علامات ظاہر ہو سکتی ہیں:
طبیعت کی خرابی
الٹی
ریڈیوایکٹیو مادّہ ِجلد سے چھو جانے پر:
جلد سرخ ہو سکتی ہے
انسان اکثر ایک عرصہ - یعنی کچھ دنوں سے لے کر کچھ ہفتوں تک - خود کو صحتمند محسوس کرتا ہے، اور پھر بیماری کا احساس ہوتا ہے۔
دھماکہ خیز مادّے جیسے بارود اور بم بہت زیادہ نقصان پہنچا سکتے ہیں۔ ان مادّوں کو دوسرے کیمیائی، بائیولوجیکل اور ریڈیونیوکلیئر مادّے یعنی CBRNE مادّے پھیلانے کے لیے بھی استعمال کیا جا سکتا ہے۔
جب دھماکے کی نوعیت معلوم نہ ہو تو اس کے نقصانات کا علاج عام فرسٹ ایڈ کی ہدایات کے مطابق کیا جاتا ہے۔