Symptom
Teikn og symptom på oppheting og dehydrering er:
- slappheit
- fall og auka tendens til å falle
- at du et og drikk mindre enn vanleg
- akutt forvirring
Dersom dette skjer, bør du eller nokon rundt deg ringje 113, ta kontakt med legevakt, lege, kommunale omsorgstenester eller anna helsepersonell. Dei kan vurdere om det er nødvendig med sjukehusinnlegging.
Råd for å unngå oppheting og dehydrering
Dei viktigaste råda for å takle hetebølgje er:
- drikk rikeleg
- bruk lette, luftige og lyse klede
- dusj eller bad i kjølig vatn, eventuelt legg våte handklede på huda
- opphald deg i kjølige rom
- reduser fysisk aktivitet
Desse er spesielt utsette
Enkelte grupper er særleg utsette for skade og død ved hetebølgjer. Det gjeld:
- eldre som er skrøpelege
- personar med demens
- personar med alvorlege kroniske sjukdomar, til dømes hjarte- og karsjukdomar
- personar som bur under dårlege sosiale forhold. Dette kan vere personar som bur åleine i byar og i høge etasjar i blokker der det er lite avkjøling og høve til å gå ut til kjøligare stader.
Ver merksam på personar med auka risiko
Dersom du kjenner nokon som er i faresona for oppheting og dehydrering, kan du besøke eller ringje dei ofte, for å sjekke at det går bra med dei. Familie, naboar, vener og omsorgstenester kan vere spesielt merksame.
Helse- og omsorgstenestene kan evakuere utsette personar for å syte for grunnleggjande behov, som riktig temperatur i omgjevnadene, mat og drikke og omsorg. Medisinsk behandling blir då gjeven av lege- eller helsepersonell med riktig kompetanse.