Maid sáhtán dahkat jus mánáš šaddá čidnohat go oažžu čižžemielkebuhtadusa?
Mánáin geat ožžot čižžemielkebuhtadusa lea dávjá garraset baika go mánáin geat njamahuvvojit. Čižžemielkebuhtadus ii suolbmuduvvo seamma jođánit go čižžemielki. Eanaš mánát baiket juohke beaivvi, muhtimat hárvvibut. Mánát berrejit dattege baikit sullii juohke nuppi beaivvi.
Jus baika lea dimis, de ii leat obbon, vaikko mánná rahčáge veahá baikit. Jus mánás lea čidnohat, sáhtát don geahččalit lonuhit čižžemielkebuhtadusa, dahje geahččalit seaguhit máltta čižžemielkebuhtadussii.
Dábálaš attusmearri lea ahte bijat 1 deadjabaste máltta 250 ml mielkái nugo 2-3 borramii jándoris. Máltta sáhtát addit njuoratmánáide.
Jus dát rávvagat eai veahket, jeara bagadusa dearvvašvuođastašuvnnas.
Go mánná lea borragoahtán borramuša, atte roavva gordnebuktagiid, šattuid, murjjiid ja ruotnasiid ja valjis čázi.
Mot jus mu mánná gii dušše njamahuvvo ii baikke nu dávjá?
Čižžemielki lea buorre máná suolbmudeapmái. Mánát geat ožžot dušše čižžemielkki obbojit hárvvibut. Mánát geat dušše njamahuvvojit, mii mearkkaša mánat geat ožžot dušše čižžemielkki ja vitamiinnaid, eai galggaše oažžut sviskesávtta, máltta ja jna.
Daid vuosttaš beivviid boahtá muhtin mánáin dušše veahá baika, muhto dat lea čáhppat, fadni ja sulastahttá bihka. Go mielki lea boahtán, 2-4 beaivve maŋŋil riegádahttima, de mánná baiká dávjjit. Lea dábálaš ahte mánná baika guktii dahje dávjjit jándoris dan vuosttas mánu. Maŋŋil dan vuosttaš mánu, muhtin mánát eai baikke šat nu dávjá. Muhtin mánáin sáhttá mannat 1-2 vahku dan rájes go leat baikán dassá fas baiket. Dat sáhttá leat hui dábálaš jus fal mánná čuovvu iežas deaddokurva.
Jus mánná lossu nugo galgá ja lea duhtavaš de mearkkaš a ahte mánná oažžu doarvái biepmu.