Mo vurket čižžemielkki?
Sáhtát bohčit čižžemielkki ja vurket maŋit áigái. Sáhtát vurket čižžemielkki galmmihanskábes dahje jiekŋabovssas. Čižžemielki lea árvosaš, sihke varasin ja galmmihuvvon. Varasin lea álo buoremus.
Dus galget leat ráinnas gieđat ja ráinnas, vuššojuvvon dávvirat. Bija lihti galmmihanskábii dahje jiekŋaboksii dakkaviđe go leat bohččán. Ane lihtti mii lea ráhkaduvvon borramušaid váste. Merke dáhtoniin ja áigemeriin.
Varas čižžemielkki sáhttá vurkejuvvot:
- guhkimus 4 diimmu latnjatemperatuvrras
- guhkimus 4 jándora siskkimusas galmmihanskábes mii ii leat eanet go +4 °C
- 6 mánu jiekŋabovssas mii lea –18 °C
Čižžemielki mii lea liggejuvvon riibá 24 diimmu galmmihanskábes, ja dan ii galgga fas galmmihit. Liggejuvvon mielkki bázahusaid galgá bálkestit guokte diimmu maŋŋel.
Mo ligget čižžemielkki?
Čižžemielki mii lea jiekŋabovssa siste galmmihuvvon, bijat galmmihanskábii máizat vai das bissu buorre kvalitehta. Ovdal attát mánnái, sáhtát ligget lieggačázis mii ii leat lieggaset go 40 °C. Jorat bohtala várrogasat, vai mielkái šaddá seamma temperatuvra. Mielkki sáhtát addit mánnái go lea loikkas (37 °C) ja don jur dovddat dan go goaikalat giehtalađđasii.
Ale ligge mikroommanis. Mikrobárut eai ligge mielkki dássedit, ja mánná sáhttá buollit dainna. Jus mielki šaddá menddo liekkas, de sáhttet immuvdnaávdnasat ja biebmoávdnasat billašuvvat.
Mánnái sáhttá maid addit čižžemielkki mas lea latnjatemperatuvra dahje lea galmmas, jus fal fuollá.
Jus it háhppet máizadit mielkki galmmihanskábes, sáhtát ligget lieggačázis. Dalle fertet atnit mielkki dalánaga. Máizaduvvon/liggejuvvon mielkebázahusaid ferte bálkestit maŋŋel guokte diimmu. Mielkebázahusaide šaddet bakteriijat álkit.