Mo dieđán leago mánás borranmiella?
Njuoratmánát njammet dávjá 8-12 geardde jándoris ja muhtumin dávjjit. Sii máŋgga láhkai čájehit ahte lea borranmiella. Áiggi mielde dovdagoađát signálaid. Sáhtát oaidnit ahte mánás lea borranmiella jo ovdalgo lihkká.
Árra signálat sáhttet leat:
- Čalmmit lihkadit čalbmerapmasa vuolde
- stoavká ja geige njuokčama olggos
- lihkahallá gieđaid ja julggiid
- ohcá čičči
- guoskkaha gieđaiguin ja suorpmaiguin njálmmi
Maŋŋil signálat sáhttet leat:
- gisaida
- jietnadallá ja čierru
- olles rumaš lihkada
Muhtin mánát geat leat hui váibasat eai čájet borranmiela. Dalle ferte boktit máná ja addit čičči. Jus mánná nohkká čižžái, fertet iskat lea go váldán čičči bures njálbmái ja oažžu go mielkki. Jus eahpidat, berret váldit oktavuođa dearvvašvuođastašuvnnain.
Leago mu mánás lasihanjándor?
Don sáhtát muhtomin vásihit ahte mánná háliida njammat dávjjit ja eanet go muđui láve. Dat sáhttá leat mearka dasa ahte mánná dárbbaša eanet čižžemielkki. Dalle dus soaitá leat dat maid gohčodit lasihanjándorin. Mánás orru leat eanet borranmiella go dábálaččat dahje lihkká dakka maŋŋel go aiddo lea boradan. Jus mánná beassá njammat dávjá ja nu ollu go háliida, de sáhtát dovdat ahte dutnje šaddá eanet mielki. Dábálaččat bistá dat 1-2 beaivvi.
Go mánná ieš beassá mearridit, de heivehuvvo mielkeráhkadeapmi máná dárbbuid ektui. Du mielkemearri rievddada dan ektui mo mánná stuorru ja dan ektui man ollu mánná váldá čiččis. Lasihanjándorat sáhttet boahtit dássedit ja eai nu dássedit, muhto eai buohkat mearkkaš daid. Muhtin mánát háliidit maid dávjjit čičči jus leat illáveaje, go čižži addá oadjebasvuođa ja návddašeami.