Maid mearkkaša dearvvašvuođadieđuid juogadeapmi?
Dearvvašvuođadieđuid juogadeapmi mearkkaša ahte dehálaš dieđut du dearvvašvuođa birra leat olámuttos dearvvašvuođabargiide geat dárbbašit daid vai sáhttet addit dutnje dorvvolaš ja buori dearvvašvuođaveahki.
Dát sáhttet ovdamearkka dihte
- leat dieđut allergiijaid
- dálkkasgeavaheami
- iskkusbohtosiid
- buozanvuođahistorjjá birra
- buohcceviesu journáladokumeanttat
Mihttomearrin lea ahte rievttes dieđut leat gávdnamis dearvvašvuođabargiide geat daid dárbbašit, rievttes áigái, beroškeahttá gos oaččut divššu.
Dát sáhttá addit dutnje buoret dearvvašvuođaveahki
Go doaktáriin, buohccidivššáriin dahje eará dearvvašvuođabargiin leat dehálaš dearvvašvuođadieđut du birra digitálalaččat olámuttos, de sáhttet sii fállat dutnje buoret čuovvoleami ja divššu.
Heahtediliin, nugo ovdamearkka dihte buohcceviesus, sáhttá leat deaŧalaš oažžut dieđuid du birra jođánit.
Go du dearvvašvuođadieđut leat digitálalaččat olámuttos, de it dárbbaš geardduhit buozanvuođahistorjjá juohke háve go deaivvadat ođđa dearvvašvuođabargiin. Dát sáhttá leat ávkin dorvvolaš ja ollislaš čuovvoleapmái, erenoamážit jus dárbbašat dearvvašvuođaveahki iešguđet osiin dearvvašvuođabálvalusas.
Dušše sii geat sáhttet duođaštit dárbbu, galget lohkat dieđuid
Dušše dearvvašvuođabargiin geat sáhttet duođaštit dárbbu, lea lohpi lohkat dieđuid du birra. Dárbbu duođašteapmi mearkkaša ahte registrerejuvvo geat sii leat, gos sii barget, beaivi ja manne sii dárbbašit oaidnit du dieđuid. Sii sáhttet iskat du dieđuid ovdal go dus lea diibmu vai besset ráhkkanit, go diibmu čađahuvvo vai oaččut rievttes veahki, ja maŋŋel duođaštan dihte divššu.
Dearvvašvuođabargiin lea jávohisvuođageasku. Sii fertejit logget sisa sihkkaris vugiin. Go dearvvašvuođabargit lohket dieđuid du birra, de dát registrerejuvvo, ja don oainnát gii lea oaidnán dieđuid. Don gávnnat logga geat leat geahččan du dearvvašvuođadieđuid Helsenorge siiddus (dárogillii).
Sáhtát ráddjet geat besset dearvvašvuođadieđuide du birra
Dus lea vuoigatvuohta mearridit iežat persovdnasuodjalusa. Helsenorges sáhtát válljet movt dearvvašvuođabargit besset du dearvvašvuođadieđuide dikšunbáikkiid rastá. Fástadoaktára pasieantajournála dieđut eai juogaduvvo dán čovdosa bokte.
Helsenorges sáhtát:
- Geahččat makkár dearvvašvuođadieđut leat registrerejuvvon du birra.
- Geahččat logga mas oidnojit buohkat geat leat geahččan du dieđuid.
- Hehttet namaid mielde dearvvašvuođabargiid beassamis du dearvvašvuođadieđuide. Hehtten gusto álohii, maiddái heahtediliin.
- Caggat buot dahje dihto dearvvašvuođadieđuid nu ahte dearvvašvuođabargit eai oainne daid.
- Várašit ahte dus leat guovddášjournála. Buot dieđut du birra sihkkojuvvojit dalle, eaige ođđa dieđut du birra vurkejuvvo guovddášjournálii boahtteáiggis.
Jus fuobmát dieđuid iežat birra mat leat boastut, de sáhtát bivdit dikšunbáikki mii lea registreren dieđuid rievdadit dahje sihkkut daid.
Logge sisa dás vai oainnát iežat persovdnasuodjalusheivehusaid (dárogillii).
Beassan dearvvašvuođadieđuid sáhttá rievddadit
Dearvvašvuođadieđuid juogadeapmi čađahuvvo cehkiid mielde dearvvašvuođabálvalusas. Buohcceviesut, fástadoaktárat ja suohkanlaš dearvvašvuođabálvalusat leat iešguđetge dásis dán sirdima oktavuođas. Makkár dieđuid dearvvašvuođabargit sáhttet oaidnit du birra, lea danne sorjavaš das gos oaččut divššu ja gii du dikšu.
Jus gávnnat unnán dahje it obanassiige gávnna dieđuid iežat birra Helsenorges, de sáhttá leat danne go dus ii leat buozanvuođahistorjá dahje danne go dearvvašvuođadieđuid juogadeapmi ii leat álgán doppe gos oaččut dearvvašvuođaveahki.