Ná sáddet vuoigatvuođaváidaga
Jus dutnje lea hilgojuvvon juoga masa doaivvut dus lea vuoigatvuohta, de sáhtát sáddet vuoigatvuođaváidaga.
Čále dán váidagii
Váidagis galget leat dieđut du birra, dan fitnodaga birra man leat váidán, ja dan mii lea dáhpáhuvvan.
Du birra
Álggos čálát iežat nama, čujuhusa ja telefovdnanummira.
Jus váiddát nuppi olbmo ovddas, de galggat maid čállit nama ja oktavuođadieđuid geasa guoská. Bija maiddái mielde fápmudusa.
Su/dan birra gean váiddát
Vuoigatvuođaváidda lea measta álo čujuhuvvon fitnodaga vuostá.
Jus áiggut váidit fástadoaktára, ruovttudivššu, buohcceruovttu dahje eará gielddalaš bálvalusa, de dieđihat guđe bálvalussii guoská.
Jus it oaččo bálvalusaid masa doaivvut dus lea vuoigatvuohta oažžut buohcceviesus, de galggat muitalit guđe oassái buohcceviesus váidda lea čujuhuvvon, omd.
- Klinihkka
- Ossodat
- Seaŋgalanjat
Dáhpáhusa birra
Atte oanehis, konkrehta čilgehusa makkár divššu it leat ožžon. Muitte čállit áiggi goas dat dáhpáhuvai.
Oza dan olbmo čujuhusa gean váiddát
Váidda galgá vuos sáddejuvvot dan dikšunbáikái man váiddát.
Dikšunbáikki poastačujuhusa sáhtát ná oažžut:
- čuojat sidjiide
- čuojat diehtojuohkinbálvalussii
- oza interneahtas
Gávnnat jođiheaddji čujuhusa (eaktodáhtolaš)
Sáhtát maid bivdit oažžut čujuhusa njuolga dikšunbáikki jođiheaddjái. Dalle sihkkarasttát ahte son geas lea bajimus ovddasvástádus boahtá diehtit mii lea dáhpáhuvvan.
Gávnnat dahje jeara čujuhusa:
- ráđđeolbmái, jus váiddát suohkana/ gieldda dikšunbáikki
- buohcceviesu hovdii, jus leat váidimin buohcceviesu
- bajimuš jođiheaddjái, jus váiddát priváhta dikšunbáikki
Sádde váidaga reivve bokte
Sádde váidaga dikšunbáikki poastačujuhussii, ja sádde kopiija jođiheaddjái jus háliidat.
Jus dikšunguovddáš mieđiha du váidagii, de sii rievdadit mearrádusaset ja váldet oktavuođa duinna addit dutnje dan fálaldaga masa dus lea vuoigatvuohta.
Jus sii eai leat ovttaoaivilis váidagiin, de sáddejuvvo dat automáhtalaččat viidáseappot Stáhtahálddašeaddjái, gii meannuda váidaga ja vástida dutnje reivve bokte.
Vuoigatvuođaváidaga skovvi
Helse Sør-Øst
Buot Helse Sør-Øst buohcceviesut fállet elektrovnnalaš skovi vuoigatvuođaváidagiid várás, earret
- Lovisenberg Diakonale Sykehus
- Diakonhjemmet sykehus
- Revmatismesykehuset
- Betanien Hospital Skien
Vuoigatvuođaváidaga skovvi Helse Sør-Øst.
Helse Nord
Buot HelseNord buohcceviesut fállet elektrovnnalaš skovi vuoigatvuođaváidagiid várás.