Om induksjon (igangsetting av fødsel)
Utgangspunktet for all fødselshjelp er å leggje til rette for eit best mogleg utfall for mor og barn. At fødselen startar av seg sjølv rundt termin (mellom svangerskapsveke 37 og 42), er vanlegvis det som gir enklast fødselsforløp.
Av og til oppstår det tilstandar i svangerskapet som gjer det nødvendig å setje i gang fødselen før den startar av seg sjølv, for å unngå mogelege alvorlege komplikasjonar for mor og/eller barn.
Dei vanlegaste årsakene til induksjon er
- høgt blodtrykk/svangerskapsforgifting
- diabetes/svangerskapsdiabetes
- langsam fostervekst (lite barn)
- Alder over 38 år er også medverkande (ved nokre fødeavdelingar er dette sett til 39 år)
- ikkje har fødd 11 dagar etter ultralydtermin (42 veker)
Les meir om induksjon på sjukehusa sine nettsider (spesialisthelsetjenesten.no).
Kor lang tid tar det?
Det er vanskeleg å vite kor lang tid ein induksjon vil ta. Om fødselen din blir sett i gang, bør du innstille deg på at det kan ta tid før fødselen startar og du føder. For nokre kvinner kan det ta fleire dagar, medan for andre går det raskare.
Det er aldri mogleg å seie nøyaktig kor lang tid ein fødsel vil ta. Faktorar som kan påverke kor lang tid fødselen tar er
- når i svangerskapet fødselen blir sett i gang
- om du har rier
- om fostervannet har begynt å renne
- om du har fødd før
Når fostervatnet går
Mistenker du at fostervatnet har begynt å lekke, skal du alltid ta kontakt med fødeavdelinga der du skal føde.
Illustrašuvdna: iStockphoto
Trivselskontroll veke 41
Alle gravide får tilbod om trivselskontroll på svangerskapspoliklinikken. Denne blir utført 4 til 7 dagar etter ultralydtermin dersom du elles er utan risiko, og tidlegare dersom du har noko høgare risiko (høg BMI, tidlegare lite barn, IVF eller liknande).
Jordmor på helsestasjonen tilviser til denne kontrollen. Trivselskontrollen kan avtalast til første vekedag som er praktisk å gjennomføre, for kvinna og sjukehuset.
Ved nokre fødeavdelingar kan trivselskontroll utførast noko seinare (41+0 til 41+3 dagar).
Kva skjer under trivselskontrollen?
Trivselskontrollen er ein utvida svangerskapskontroll. Hugs å ta med deg Helsekort for gravide og andre papir du har fått av jordmor eller lege til kontrollar.
Plan for vidare behandling og oppfølging blir lagt samen med deg etter undersøkingane og ei vurdering av din og barnets tilstand.
Dei aller fleste reiser heim etter den første terminkontrollen med ny avtale om time til andre terminkontroll (overtidskontroll). For dei fleste vil fødselen starte av seg sjølv før overtidskontrollen.
Ulike metodar for induksjon
Under graviditeten er livmorhalsen fast og fleire centimeter lang. Etter kvart som du nærmar deg fødselen, blir livmorhalsen moden. Det vil seie at den blir mjukare og kortare, og begynner å opne seg.
Det er ulike metodar som kan brukast for å framskunde ein fødsel. Kva metode som er best for deg, blir avgjort av lege eller jordmor. Modningsgrada av livmorhalsen er med på å bestemme kva induksjonsmetode som blir brukt.
Lege og jordmor vurderer modningsgrada av livmorhalsen (Bishop skår) før og under induksjonen for å avgjere framgang.
Modning av livmorhalsen med ballongkateter
Er livmorhalsen lite moden, startar induksjonen ofte med å legge inn et Foley-kateter, også kalla ein ballong. Ballongkateter er eit gummikateter med ein ballong i enden.
Modning av livmorhalsen ved bruk av medikament (Prostaglandin)
Målet med denne behandlinga er å modne livmorhalsen og stimulere til samantrekningar og rier. Prostaglandin blir framstilt syntetisk, og blir brukt for å oppnå denne effekten. Det blir gitt i form av ein kapsel som blir lagd inn i skjeden (stikkpille) eller ein tablett du svelger.
Stikke hol på fosterhinnene (ta fostervatnet)
Når livmorhalsen har byrja å opne seg, vil jordmor eller lege stikke hol på fosterhinna med ein plastkrok gjennom skjeden. Dette blir kalla amniotomi og er ikkje smertefullt for deg eller barnet. Du får då vassgang som stimulerer til rier.
Drypp for å stimulere til rier
Dersom riene ikkje blir sterkare og regelmessige i løpet av 2 til 3 timar etter at vatnet er teke, blir det starta eit riestimulerende drypp med Oxytocin. Dette vil påverke livmora til å trekkje seg saman og etablere rier.