Dát ortnet guoská dikšumii sihke EØS-guovllu siskkobealde ja olggobealde.
Jus dus lea dákkár vuoigatvuohta, de gokčá sihke dikšuma ja mátkegoluid du guvllolaš dearvvašvuođadoaimmahat. Dikšun olgoriikkain dán ortnega olis guoská maiddái Norgga njuolggadusaide pasieantabuhtadusa birra jus dearvvasvuođafuolahusa ollašuhttimis šaddá boasttuvuohta dahje eahpelihkostupmi dearvvašvuođabálvalusa čađaheamis. Dábálaččat eai gokčojuvvo golut geahččaladdan- dahje geahččaleaddjidikšumii.
Ávžžuhit ohcat dohkkeheami ovdal go dohkkehat dikšunfálaldagaid olgoriikkain, muđui mávssát ieš mátkegoluid ja manat iežat riskkain. Plánejuvvon dikšun olgoriikkain ii dábálaččat gokčojuvvo dábálaš mátkedáhkádus ge.
Dohkkeheami ohcamuš sáddejuvvo olgoriikakantuvrii dan dearvvašvuođaregiovnnas gos orut:
- Utenlandskontoret for Helse Sør-Øst og Helse Nord
- Utenlandskontoret i Helse Midt-Norge
- Utenlandskontoret i Helse Vest
Dattetge addá álbmotdáhkádusláhka maiddái dutnje geas lea vuoigatvuohta oažžut dikšuma Norggas, vejolašvuođa oažžut dan čađahuvvot nuppi EØS-riikkas. Sáhtát oažžut buhtadusa Helfo buohcceviessodivššus ja eará spesialistadearvvašvuođafuolahusa bálvalusaid goluid (dárogillii), jus dihto eavttut devdojuvvojit. Fuomáš ahte dát ortnet guoská dušše dalle go oaččut divššu mii vástida dan maid oaččut Norggas.
Biehttalus gokčat olgoriikka dikšuma goluid
Jus dus lea biehttaluvvon gokčojuvvot olgoriika dikšuma goluid, sáhtát váidit. Njeallje vahku siste galggat sáddet váidaga olgoriikakantuvrii guvllolaš dearvvašvuođadoaimmahahkii mii lea dahkan mearrádusa.
Jus olgoriikakantuvra dohkkeha hilguma, de sii sáddejit du váiddaášši Dearvvašvuođabálvalusa nationála váiddaorgánii ođđasit meannudeapmái.Go váiddaásahus lea dahkan mearrádusa, de sii sáddejit mearrádusa dutnje dahje du ovddasteaddjái.
Jus it leat ovttaoaivilis Dearvvašvuođadoaimmahaga Stáhta váiddaásahusa mearrádusain, de sáhtát váidit sin. Dan dagat go sáddet stevdnema diggái. Dan birra sáhtát lohkat eanet neahttasiidduin «Háliidat go stevdnet mearrádusa» (helseklage.no).