​Don válljet ieš gos háliidat vuostáiváldit divššu, muhto mátkkiin dikšuid lusa vuođđodearvvašvuođabálvalusa suorggis (nugo fástadoavttir), oaččut dábálaččat dušše gokčot goluid mat vástidit mátkki lagamus báikái go fállet dearvvašvuođabálvalusa. Eanaš háviid gusto prinsihppa das ahte lagamus fástadoavttirbáiki lea iežat ássangielddas.

Dikšunmátkkiide spesialistadearvvašvuođabálvalusa suorggis (nugo buohccivissui), de rehkenasto lagamus dikšunbáiki iežat dearvvašvuođaregiovnnas.

Dákkár mátkkiin mávssát don dábálaš iežasoasi mátkkis, jus dus ii leat friddjakoarta ii ge luvvensivva.

Jus leat ožžon divššu iežat dearvvašvuođaregiovnna olggobealde ja leat geavahan friddja dikšunválljema rievtti, de sáhtát oažžut gokčot mátkki alit iežasosiin.

​Pasieantamátkkit mat leat čađahuvvon golggotmánu 1.b. 2016 ja dan maŋŋá, dábálaččat gokčojuvvojit standárdamáksomeriin juohke kilomehteris, goluid sadjái mat vástidit mátkkiid hálbbimus ruvttosáhtuin.

Jus mátki lea badjel 300 kilomehtera goappáge guvlui, de oaččut gokčot mátkegoluid mat vástidit hálbbimus ruvttosáhtu goluid.

Fertet leat mátkkoštan guhkit go 10 kilomehtera jus dus galggaš leat vuoigatvuohta oažžut gokčot mátkegoluid. Dasa lassin fertejit mátkegolut leat stuorát go báikkálaš unnimusmáksu almmolaš sáhtuin.

Fuomáš ahte don almmatge sáhtát ohcat oažžut gokčot goluid mátkkiide mat eai deavdde dáid gáibádusaid, jus dus lea duođaštus dikšus ahte fertejit mátkkoštit biillain dahje táksiin dearvvašvuođa geažil.

Girdi

Jus fertet girdiin mátkkoštit, de galgá du báikkálaš pasieantamátkekantuvra diŋgot dan du ovddas. Pasieantamátkekantuvrii sáhttá riŋget 05515.

Jus dattetge vállježat máksit mátkki ieš, de oaččut gokčot standárdamáksomeriin mátkkiin vuollil 300 kilomehtera. Mátkkiin badjel 300 kilomehtera oaččut gokčojuvvot goluid mat vástidit hálbbimus almmolaš sáhttu.

​Jus don it sáhte geavahit ruvttosáhtu ovdan ruoktot dikšui, de sáhtát oažžut rekvisišuvnna láhččojuvvon sáhttui iežat dikšus dahje iežat báikkálaš pasieantamátkekantuvrras.

Rekvisišuvnnain mátkkoštit mearkkaša ahte pasieantamátkekantuvra ordne mátkki dutnje, ja vállje sáhtu mii lea ulbmilleamos. Don mávssát dušše iežasoasi mátkkis.

Fertejit leat juogo dearvvašvuođa- dahje johtolatsivat dasa go it sáhte mátkkoštit ruvttosáhtuin olles dahje oasi mátkkis. Jus leat dearvvašvuođasivat dasa go it sáhte mátkkoštit ruvttosáhtuin, de fertet váldit oktavuođa iežat dikšuin. Jus leat johtolatsivat dasa go it sáhte mátkkoštit ruvttosáhtuin, ovdamearkka dihtii váilevaš sáhttofálaldagat gaskkas, de fertet váldit oktavuođa iežat báikkálaš pasieantamátkekantuvrrain telefovnnain 05515.

​Pasieantan it dárbbaš bidjat mielddusin boahtinduođaštusa dikšus mátkkiin mat dáhpáhuvve maŋŋá golggotmánu 1.b. 2016. Dát dieđut vižžojuvvojit baicce njuolga olámuttu registariin. Fuomáš ahte jus don fuolaheaddjin ozat oažžut gokčot mátkki iežat gaskal 12- ja 18-jahkásaš máná ovddas, de fertet bidjat boahtinduođaštusa mielddusin. Dás lea sáhka máná personsuodjalusas.

Jus leat leamaš pasieantta mieđušteaddji ja áiggut ohcat oažžut gokčot iežat mátkegoluid, de ferte maiddái dus leat boahtinduođaštus mii čájeha ahte pasieanta lea leamaš divššus, ja ahte pasieanta dárbbašii mieđušteaddji.

​Sáhtát oažžut gokčot táksegoluid dahje biilageavaheami lassigoluid (nugo biilafearga, parkeren, bumma dahje biikadeahkkadivat), jus duođaštat ahte dasa lei dárbu, ja bijat guittiid iežat ohcamuša mielddusin.

Du dikšu dat ferte duođaštit ahte dárbbašit priváhta biilla dahje tákse dearvvašvuođa geažil. Jus leat johtolatsivat dasa ahte dárbbašat priváhta biilla dahje tákse mátkkis, de ferte pasieantamátkekantuvra duođaštit dán.
Jus it sáhte duođaštit ahte lea dárbu priváhta biilii, de oaččut dábálaččat gokčot mátkki standárdamáksomeriin juohke kilomehteris.

Fearga

Standárdamáksomearri juohke kilomehteris gokčojuvvo maiddái jus leat mátkkoštan biilafearggain osiin mátkkis. Jus dus ii leat biila mielde fearggas, de oaččut gokčojuvvot mátkkošteaddjibileahta standárdamáksomeari sadjái juohke kilomehteris feargagaskkas. Bileahta guite fertet bidjat ohcamuša mielddusin.

​Mieđušteaddjis lea vuoigatvuohta oažžut gokčot mátkki jus dikšu duođašta mieđušteaddjidárbbu mátkkis dearvvašvuođa sivaid geažil. Jus pasieanta ja mieđušteaddji leaba mátkkoštan biillain, de gokčojuvvot dušše okta standárdamáksomearri juohke kilomehteris.

Jus pasieanta ja mieđušteaddji leaba mátkkoštan almmolaš sáhtuin, de sáhttiba sihke mieđušteaddji ja pasieanta oažžut gokčot mátkki standárdamáksomeriin. Guitte dahje bileahta ferte bidjat ohcamuša mielddusin.

Go mieđušta máná vuollil 18 jagi, de ii dárbbaš duođaštit mieđušteaddjidárbbu. Dábálaččat gokčojuvvo ovtta mieđušteaddji mátki, muhto jus mánná čálihuvvo sisa buohccivissui, de sáhttiba goappašat váhnemat oažžut gokčot mátkki, beroškeahttá das mieđušteaba go máná. Goappašagat váhnemat sáhttiba maiddái oažžut gokčot mátkki jus mieđušteaba duođalaččat buohcci máná ovdan ruoktot dikšui.

​Jus leat gažaldagat dahje dárbbašat eanet dieđuid pasieantamátkkiid birra, de sáhtát váldit oktavuođa iežat báikkálaš pasieantamátkekantuvrrain telefovnnain 05515.