Ulike variantar av parfymar
Parfyme, etterbarberingsvatn (aftershave), eau de toilette, eau de cologne og liknande produkt som skal gi god lukt, inneheld ofte etanol (alkohol) og parfymestoff.
Symptom ved svelging av parfyme
Svelging av parfyme kan gi irritasjon i munn og/eller mage. Inntak kan difor føre til kvalme og oppkast.
Symptom utover magesymptomar skuldast ofte at inntaket er større, og gir forgiftning frå etanol eller andre stoff tilsatt i parfymen.
Førstehjelp ved svelging av parfyme
- Gi litt drikke
- Ved inntak av meir enn ei 1/2 teskei skal du kontakte Giftinformasjonen for vurdering og råd.
- Ved meir enn heilt lette symptom skal du kontakte lege/legevakt.
Er du usikker på kor mykje det kan vere i ein sprut frå parfymeflaska, kan du prøve å spraye ein gong i ei teskei for å sjå.
Ved sprut av parfyme i auge
Parfyme inneheld stoff som verkar irriterande og kan føre til svie og raudne på auget.
- Fjern eventuelle kontaktlinser.
- Skyl godt med rennande lunka vatn i 2–5 minutt.
- Kontakt lege ved vedvarande ubehag.